اكو بنية حلوة كلش، ومن بيت معروف، لهذا السبب هي مغرورة كلش هواي، وكلما تزوجت من شخص، ما تبقى ويا لفترة طويلة بسبب الغرور، وسرعان ما يطلقها، لكونها متكبرة وسليطة اللسان، وما تحترم أحد.
كثرة زواجها وطلاقها جعل أهلها محرجين امام المنطقة، ولهذا من رادت تطلق لأخر مرة، اشترط عليها ابوها، بعد ماتزوج مرة ثانية.
فد يوم شافهة شاب تمشي بالسوق، أعجب بها، ورغب بالزواج منها، وعند سؤاله عنها، الجميع نصحه بعدم التقرب اليها، لأن عدها صفات تختلف عن شكلها، صح هي جميلة الشكل، لكن عدها قباحة تصرف وخلق، وهو شاب هادئ، ما يكدر ينسجم معها.
البنية حلوة، وما تتفوت، لذلك قرر الزواج منها بالرغم من النصائح الي قدموها له، فعلاً تقدم لها، ابوها كله يابة بنتي هذي سالفتها, لذلك اذا تزوجها, مو من حقك تطلقها لهذه الأسباب.
الولد وافق، بشرط انهم لايتدخلون بينهم مهما سمعوا، وما يستقبلون ابنتهم ان جاءت إليهم وهي زعلانة، وافق الاب أيضاً.
فعلاً تزوج البنت، ومن اجة يأخذها من بيت اهلها، جاب وياه قطة جميلة جداً، بالطريق أخبر زوجتها، أن هذه القطة ابنة قطته السابقة، التي قتلها قبل أسبوع لأنها أيقظته من النوم بصوتها.
عند وصولهم للبيت، كلم القطة، وطلب منها ان لاتحدث أي صوت، لكنها حيوان ولاتعرف مايقول، راحت تحدث أصوات، فسارع الى اخراج سكينته والقطة، وخرج من غرفته، دقائق وعاد ويداه مملؤة بالدماء.
عرفت الزوجة انه قد قتل القطة، بعد قتل أمها بأسبوع، بعد ان غسل يديه، نظر الى زوجته وهو يبتسم، وكلها بعدما خلصنا من القطة، يالله كومي سويلي ماي دافئ وملح، وغسلي رجلي.
بالبداية رادت ترفض، وترد عليه بنفس طريقة كلامها الي متعودة عليه، لكن تذكرت القطة وماجرى عليها.
من ذيج الساعة ولغاية اليوم البنية تمشي مثل الساعة، وصار عدهم اسرة كبيرة، وعايشين بسعادة.
رباط السالفة.
من تغيير النظام لغاية الان، ونحن نعيش ديمقراطية منفلتة، سواء على مستوى الشعب او الحكومة، فالشعب يرمي العيارات النارية، ويحرق البيوت على ابسط مشكلة، كما يتجاوز على الشارع والحقوق العامة ولا أحد يحاسبه، باسم الديمقراطية.
اما السياسيين والحكومات، فجعلت كل شيء مباح لها، فأغلب السياسيين جعل من البلد مرتع للسلب والنهب المنظم، والعذر أيضا، الديمقراطية ومظلوميته من النظام السابق.
هذا جعلنا نعتقد ان لا أحد يستطيع انقاذنا مما نحن فيه، مهما كانت علميته وإمكانياته، ان لم يستخدم الحزم، ومن اجل ذلك يجب ان يذبح القطة، وما أكثر القطط التي لدينا، التي تستحق الذبح؟ لكن قطعا وفق القانون.